प्रधानमन्त्री केपी शर्मा ओलीले सरकारलाई विश्राम गर्ने सुविधा नरहेको भन्दै तिब्रताका साथ सरकारका काम कारबाही अघि बढाउन मन्त्रीहरुलाई निर्देशन दिनुभएको छ ।
बिहीबार सिंहदरबारमा उपप्रधानमन्त्री तथा मन्त्रीहरुसँग कार्यसम्पादन सम्झौता गर्दै प्रधानमन्त्री ओलीले मन्त्रीहरुलाई सो निर्देशन दिनुभएको हो ।
प्रधानमन्त्री ओलीले मन्त्रीहरुलाई विश्राम गर्ने, अलमल गर्ने, ढिलो गर्ने छुट नरहेको बताउनुभयो । उहाँले अब कार्यक्षेत्रमा थप योजना र थप सक्रियताका साथ अघि बढ्नुपर्ने बताउनुभयो । उहाँले सरकारका कामलाई तिब्रता दिनेगरी अघि बढ्न आग्रह गर्नुभयो ।
प्रधानमन्त्री ओलीले बिस्तारै गरौंला नि भन्ने सोचले अहिलेसम्म काम हुन नसकेको भन्दै अब त्यो सोच नराख्न आग्रह गर्नुभयो । उहाँले काममा तिब्रतासँगै योजनावद्धता आवश्यक रहेको बताउनुभयो । मन्त्रालयबीच एक अर्कालाई सहयोग गर्ने भावना हुन जरुरी रहेको बताउनुभयो ।
