पहिरोका कारण अवरुद्ध बनेको त्रिभुवन राजपथको नागढुङ्गा-नौबिसे सडकखण्डमा सवारी आवागमन सहज बनाउन पहिरो पन्छाउने कार्य सुरु भएको छ ।
बिहीबार साँझदेखि परेको अविरल वर्षाका कारण ठाउँ ठाउँमा पहिरो खस्दा अवरुद्ध राजमार्ग आइतबार साँझ सञ्चालनमा आएपनि सो खण्डमा अझै धेरै ठाउँमा सडक एकतर्फी मात्रै भएकोले सवारी जाम लागेको छ ।
पर्व सुरु हुन लागेकोले राजधानीबाट बाहिरिने र राजधानी प्रवेश गर्ने सवारी निकै बढ्दै गएको र बढ्दो सवारी जामलाई मध्यनजर राख्दै आज बिहान ११ बजेदेखि मध्यान्न १ बजेसम्म सडकखण्डमा दुवैतर्फ यातायात बन्द गरी पहिरो पन्छाउन लागिएको हो ।
राजमार्ग सुरक्षा तथा ट्राफिक व्यवस्थापन कार्यालय रामनगरका प्रमुख प्रहरी उपरीक्षक नरेश सुवेदीका अनुसार झ्याप्ले खोलामा खसेको पहिरो केही हटाएर सवारी सुचारु गरेपनि दर्जनौँ स्थानमा अझै पहिरो पन्छाई दुवैतर्फ सवारी सञ्चालन गराउन बाँकी भएकोले केही घण्टा सवारी रोकी काम गर्ने बताए ।
उनका अनुसार अब पृथ्वी राजमार्गमा पनि मध्यान्नसम्ममा सबै स्थानको पहिरो पन्छाई दुवैतर्फी यातायात सञ्चालन सुरु हुनेछन् ।
