प्रदेश सरकारहरुले अब सवारी चालक अनुमतिपत्र लाइसेन्सको छपाइ नहुँदासम्म कर तिरेको रसिदमै क्यूआर कोड र फोटो राख्ने भएका छन्।
गत २० साउनमा सबै प्रदेशका यातायात मन्त्रीहरू सहभागी बैठकले लाइसेन्स छपाइमा भएको ढिलाइलाई ध्यानमा राखेर प्रदेशहरूले नै लाइसेन्स छाप्न तयारी थाल्ने र लाइसेन्स जारी गर्दा वा नवीकरण गर्दा उपलब्ध गराइने राजस्व तिरेको रसिदमै क्युआर कोड र लाइसेन्सबाहकको फोटो राख्ने निर्णय गरेको थियो।
अहिले देशभर लाइसेन्स परीक्षा पास गरिसकेका २० लाख जनाको लाइसेन्स छाप्न बाँकी छ। जसमध्ये बागमती प्रदेशका मात्रै करिब ८ लाख ५० हजार लाइसेन्स छाप्न बाँकी रहेको मन्त्रालयले जनाएको छ।
अहिले दैनिक औसत ५ हजार वटा नयाँ लाइसेन्स जारी वा नवीकरण हुन्छन्। लाइसेन्स छपाईका लागि बागमती प्रदेश सरकारले प्रर्याप्त बजेट विनियोजन गरेको समेत प्रदेशको श्रम रोजगार तथा यातायात मन्त्रालयले जनाएको छ।
