सुनसरीको देवानगञ्ज गाउँपालिकास्थित कप्तानगञ्जमा आइतबार राति प्रहरीको गोली लागेर घाइते भएका अर्का युवकको उपचारका क्रममा मृत्यु भएको छ। अब त्यहाँको घटनामा ज्यान गुमाउने युवा दुई पुगेका छन् ।
देवानगञ्ज गाउँपालिका-३ निवासी २२ वर्षीय जयप्रकाश मेहताको बिहीबार दिउँसो मृत्यु भएको मोरङ प्रहरीले जनाएको छ ।
विराटनगरको न्यूरो अस्पतालमा उपचारका क्रममा ती युवकको ज्यान गएको मोरङ प्रहरीका सूचना अधिकारी एवम् डीएसपी मकेन्द्रकुमार मिश्रले बताएका छन् ।
उक्त प्रकरणमा प्रहरीसहित २२ जना घाइते भएका थिए । जसमध्ये १० जना युवालाई गोली लागेको थियो । अहिले पनि गोली लागेका ८ जना युवाहरूको मोरङको विराटनगरका विभिन्न अस्पतालमा उपचार जारी रहेको छ ।
