नेपाली काँग्रेसका सभापति शेरबहादुर देउवाले बीपी कोइरालाले अपनाएको सिद्धान्त अहिले पनि उत्तिकै सान्दर्भिक भएको बताएका छन् ।
बीपी कोइरालाको ४३औं स्मृति दिवसको अवसरमा काठमाडौँको बसुन्धरामा आयोजित ‘देश विकास र देशवासीको उन्नतीको आधार- बीपी बिचार’ बिषयक गोष्ठीलाई सम्बोधन गर्दै सभापति देउवाले राष्ट्रिय एकता, सामाजिक सदभावलाई अझ बलियो बनाउन बीपी कोइरालाले अपनाएको सिद्धान्त अहिले पनि उत्तिकै सान्दर्भिक रहेको बताएका हुन् ।
देउवाले बीपीको सिद्धान्त र मूल्य मान्यताले नै कांग्रेस आजको स्थितिमा आएको बताउदै भने- ‘राष्ट्रिय एकता, सामाजिक सदभावलाई अझ बलियो बनाउन बीपी कोइरालाले अपनाएको सिद्धान्त अहिले पनि उत्तिकै सान्दर्भिक छ । उहाँको त्याग, योगदान, स्थापित मूल्य मान्यताले नै नेपाली कांग्रेसलाई आजको स्थितिमा ल्याएको हो ।’
सभापति देउवाले बीपी कोइरालाको जीवन सधैं संघर्ष र आन्दोलनमा नै गुज्रिएको उल्लेख गर्दै बीपी कोइरालाको राजनीतिक वा साहित्यिक चिन्तन कांग्रेसका लागि मात्र नभई आधुनिक नेपाल निर्माणका लागि समेत मार्गदर्शन भएको बताएका थिए ।
