राष्ट्रिय स्वतन्त्र पार्टीकी सांसद सुमना श्रेष्ठले संघीय मामिला तथा सामान्य प्रशासनमन्त्री राजकुमार गुप्ता घुस प्रकरणमा जोडिएको अडिओ प्रकरणबारे छानबिन हुनुपर्ने माग गरेकी छन् ।
आइतबार बसेको प्रतिनिधिसभाको बैठकमा बोल्ने क्रममा उनले मन्त्री गुप्ता जोडिएको अडिओ प्रकरणको छानबिन हुनुपर्ने माग गरेकी हुन् ।
पूर्वशिक्षामन्त्री समेत रहेकी उनले दुई दिनअघि संघीय मामिला तथा सामान्य प्रशासनमन्त्री गुप्ताले घुस डिल गरिरहेको अडिओ बाहिरिएको अवस्थामा सरकार चुप बस्न नसक्ने बाइन् ।
उक्त अडिओमा भूमिमन्त्रीको नाम पनि पटक–पटक लिइएको उनले बताइन् । ‘मन्त्रीको घुस काण्डमा भनिएका ‘बा’ को हुन् ?’, उनले प्रश्न गरिन् ।
श्रेष्ठले मालपोत कार्यालयको प्रमुख पठाउनेदेखि भूमि आयोगका जिल्ला अध्यक्ष नियुक्तिमा पनि घुसको सेटिङ चलिरहेको बताइन् ।
‘कास्की मालपोत कार्यालयमा को पठाउनेमा पनि घुस, त्यहीँकै भूमि आयोग जिल्ला अध्यक्षमा पनि लेनदेनको सेटिङ ? किन भूमि विधेयक फास्ट ट्रयाकबाट पास गर्न खोजिएको बुझियो’, उनले भनिन्, ‘आफूअनुकूल मान्छे, आफूअनुकूल कानुन । उक्त घुस प्रकरणमा एकजना मन्त्रीले अर्को मन्त्रीलाई पोलेको सुनिएको छ । यसको छानबिनको माग गर्छौं ।’
