आइतबार सेयरबजार परिसूचक (नेप्से) १६.६८ अंकले घटेर २७०६.०४ अंकमा बन्द भएको छ।
नेपाल राष्ट्र बैंकको गभर्नर बन्ने अन्तिम चरणमा रहँदा त्यसको प्रभाव बजारमा देखिएन। सामान्यतया नयाँ व्यक्ति गभर्नरमा आउने कुराले बजारमा उत्साह छर्ने गर्छ।
यो दिन दोहोरो अंकले घटेको बजारमा लगानीकर्ताले कारोबार पनि खुम्च्याएर ८ अर्बमा झारेका छन्। अघिल्लो कारोबार दिन (बिहीबार) साढे १० अर्बको कारोबार गरेका लगानीकर्ताले आइतबार ८ अर्ब १२ करोडको मात्रै कारोबार गरेका हुन्।
कारोबार सुरु भएबाटै घट्न थालेको बजारले दिनभर राताम्मे भएरै बितायो। यो दिन नेप्से अधिकतम विन्दु २७३१ अंकमा पुग्यो भने न्यूनतम विन्दु २७०० सम्म ओर्लिन पुग्यो। समग्रमा अन्तिम समयमा सम्हालिँदै १६ अंकको गिरावटसँगै नेप्से २७ सय माथि नै बन्द हुन पुग्यो।
