निर्मल निवासमा छिरेर निस्किएपछि ‘राजसंस्था पुनर्स्थापनाका लागि संयुक्त जनआन्दोलन समिति’ले मेडिकल व्यवसायी दुर्गा प्रसाईंलाई ‘कमान्डर’ तोकेको छ ।
पूर्वराजा ज्ञानेन्द्र शाहलाई फेरि राजगद्धीमा फर्काउने नाममा गठन भएको समितिले शुक्रबार हुन लागेको आन्दोलनका लागि प्रसाईंलाई कमान्डर तोकेको हो ।
चाबहिलको स्मार्ट पार्टी प्यालेसमा बिहीबार आयोजित पत्रकार सम्मेलनमा संयुक्त जनआन्दोलन समितिका संयोजक नवराज सुवेदीले प्रसाईंलाई ‘कमान्डर’ तोकिएको जानकारी दिए ।
राजावादीले व्यवसायी प्रसाईंकै नेतृत्वमा शुक्रबार काठमाडौंमा प्रदर्शन गर्दैछन् । जिल्ला प्रशासन कार्यालय काठमाडौंले उनीहरूको प्रदर्शनका लागि तीनकुनेलाई स्थान तोकेको छ ।
प्रसाईंले बिहीबार दिउँसो निर्मल निवास छिरेर पूर्वराजा शाहसँग मन्त्रणा गरेका थिए। गत फागुन २५ मै प्रसाईंले निर्मल निवास छिर्न खोजेका थिए। तर त्यसबेला उनलाई निर्मल निवासमा इन्ट्री मिलेको थिएन । प्रसाईंसँगै बिहीबार आन्दोलन समितिका संयोज सुवेदीले पनि पूर्वराजा शाहलाई भेटेका छन् ।
