नेपालका ग्रामीण तथा हिमाली क्षेत्रमा बसोबास गर्ने महिलाहरूमा पाठेघर खस्ने समस्या बढी रहेको तथ्य विभिन्न अध्ययन/अनुसन्धानहरूले देखाएका छन्। नेपालमा ६ लाख महिलाको पाठेघरको शल्यक्रिया गर्नुपर्ने अवस्था रहेको ती अध्ययनहरूले देखाएका हुन् ।
ग्रामीण भेगको रूपमा रहेको सिन्धुपाल्चोकको त्रिपुरा सुन्दरी गाउँपालिकाका महिलाहरूमा यस्तो समस्या बढ्दो रहेकाले विगत ३ वर्षदेखि स्क्रिनिङ गरी आवश्यकताअनुसार उपचारका लागि सहरका अस्पतालमा ल्याउने क्रम बढ्दो रहेको पालिकाका अध्यक्ष भक्तध्वज बोहराले बताउनुभयो ।
अध्यक्ष बोहोराका अनुसार सो पालिकामा थामी, जिरेललगायतका जातिको बढी बसोबास रहेको छ । त्यहाँका महिलाहरूले पाठेघर झर्ने समस्या लुकाउने र आर्थिक अभावका कारण उपचारको पँहुचमा पुग्न नसक्ने समस्या विकराल रूपमा रहँदै आएको छ।
सो पालिकाले निःशुल्क स्क्रिनिङ र शल्यक्रियाका लागि विभिन्न अस्पतालसँग सहयोग लिँदै आएको छ। सोअनुसार पालिकाले ०७९ सालमा चौतारा अस्पतालसँगको सहकार्यमा स्क्रिनिङ गरी थापाथली स्थित प्रसूतिगृहमा ल्याई ११ जनाको शल्यक्रिया गराएको थियो।
स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीका अनुसार पाठेघर खस्ने समस्या भएका महिलाहरूको उपचारका लागि सरकारी अस्पतालमा निःशुल्क शिविर, रिङपेसरीङ राख्ने, शल्यक्रिया गर्ने जस्ता उपचार सरकारी अस्पतालमा निःशुल्क गरिँदै आएको छ।
नेपालको पहाडी, हिमाली भेगका महिलामा सबैभन्दा बढी पाठेघर खस्ने समस्या पाइएको त्रिपुरा सुन्दरी गाउँपालिकाका स्वास्थ्य शाखा प्रमुख चन्द्रनारायण शाहले बताउनुभयो।
