सुप्रिम सहकारी ठगीसम्बन्धी मुद्दामा आज पनि रूपन्देही जिल्ला अदालतमा थुनछेक बहस जारी छ । सहकारी ठगी र संगठित अपराधको अभियोग लागेका रास्वपाका सभापति एवं गोर्खा मिडिया नेटवर्कका पूर्व प्रवन्ध निर्देशक रवि लामिछाने मुद्दाको प्रतिवाद गर्न आज चौथो दिन पनि अदालतमा उपस्थित भएका छन् ।
रवि गत बुधबार जिल्ला अदालतमा उपस्थित भएका थिए । जिल्ला अदालतका न्यायाधीश प्रल्हादकुमार योगीको इजलासमा मुद्दा परेपछि उनले सोही दिन बयान दिएर परिवार र वकिलको जिम्माजमानीमा बस्दै आएका छन् ।
न्यायाधिश योगीको इजलासमा विहिवार उच्च र जिल्ला सरकारी वकिल कार्यालयका वकिलहरुले, शुक्रबार जाहेरी तर्फका वकिल र प्रतिवादीका वकिलले बहस गरेका थिए । शुक्रबार बहस नसकिएपछि आज आइतबारका लागि पनि मुद्दा हेर्दाहेर्दैमा राखिएको थियो । बुधबारदेखि लामिछाने होटलमा बसेर अदालतमा नियमित हाजिर भएर मुद्दाको प्रतिवाद गर्दै आइरहेका छन् ।
आइतबार प्रतिवादीका वकिल रमण श्रेष्ठ, राजेन्द्र सेढाईसहितका बाँकी वकिलले बहस गरेपछि जाहेरवालाका तर्फबाट र सरकारी वकिलहरुले जवाफी बसह गर्ने छन्। बहस सकिएपछि न्यायाधीश योगीले पुर्पक्षका लागि थुनामा पठाउने, धरौटी लिने वा सामान्य तारेखमा रिहाई गर्ने भन्ने आदेश दिने सक्ने अदालतका श्रेस्तेदार यज्ञमूर्ती ज्ञवालीले बताए ।
‘बहस सकेर आजै आदेश गर्ने सम्भावना छ,’ उनले भने । लामिछानेसहित २२ जनालाई ५५ करोड बढी बिगोसहित पुरक मुद्दा दर्ता गरिएको छ । मुद्दामा लामिछाने, छविलाल जोशी र लक्ष्मीप्रसाद पौडेललाई छुट्टै १० करोड ९९ लाख र रविको व्यक्तिगत २ करोड बिगो माग गरिएको छ ।
