मुलुकको अर्थतन्त्रमा आएको शिथिलताको कारणले प्रभावित बन्दै आएको सेयरबजार आइतबार भने उच्च अंकले बढेर सुधारको छनक देखापरेको छ। लामो समयदेखि सेयरबजारमा उच्च अंकले गिरावट आएका कारणले सेयर लगानीकर्तामा चरम निराशाबीच आइतबार ४७.७५ अंकले बढेसँगै सेयर बजारमा सुधारको संकेत देखिएको छ।
नेपाल राष्ट्र बैंकले मौद्रिक नीतिको त्रैमासिक समीक्षा र नेपालका बैंक तथा वित्तीय संस्थाले ब्याजदर घटाएसँगै सेयर बजारमा सुधार देखिने सम्भावना बढेको हो। यद्यपि आइतबार बढेको सेयर बजार आगामी दिनमा निरन्तरता कायमै रहन्छ वा रहँदैन भन्ने आशंका भने कायमै छ।
आइतबार नेप्से परिसूचक ४७.७५ अंकले बढेर १९०७.९५ विन्दुमा आइपुगेको छ। नेपाल स्टक एक्सचेन्जका अनुसार आइतबार विगत चार महिना यताकै उच्च अंकले बढेको हो। गत साउन ४ गते ६३.२४ अंकले बढेको थियो। त्यस दिन यता आइतबार नै उच्च अंकले बढेको हो। कारोबार रकममा पनि आइतबार उच्च रकमले वृद्धि भएको छ।
