प्यालेस्टाइनी लडाकुहरुले इजरायलमाथि भीषण आक्रमण सुरु गरेका छन् । शनिबारबाट हमास, प्यालेस्टाइन इस्लामिक जिहाद लगायतका प्यालेस्टाइनी लडाकु समूहले गाजापट्टीबाट इजरायलमाथि आक्रमण सुरु गरेका हुन् । ऐतिहासिक रुपमा विभिन्न धार्मिक एवम् राजनीतिक द्वन्द्वको चपेटामा पर्दै आएको सो क्षेत्रमा प्यालेस्टाइनी लडाकुहरुले क्षेप्यास्त्रसँगै स्थल आक्रमण गरिरहेको अन्तर्राष्ट्रिय सञ्चार माध्यमले जनाएका छन् ।
शनिबार सबेरै प्यालेस्टाइनी लडाकुले इजरायलतर्फ रकेट आक्रमण गरेका थिए । रकेट आक्रमणसँगै उनीहरुले स्थल कारवाही थालेका थिए । हाल प्यालेस्टाइनी लडाकुले स्देरोत, कफ्र अजा, ओफाकिम, नहल ओजजस्ता केही सीमावर्ती सहरमा प्रवेश गरी गोली चलाइरहेको जनाइएको छ । हालसम्म कति लडाकु इजरायली भूमिमा प्रवेश गरेका छन् भन्ने स्पष्ट भइसकेको छैन । इजरायली प्रहरीलाई उद्धृत गर्दै रोयटर्सले जनाएअनुसार दक्षिणी इजरायलका २१ स्थानमा दोहोरो गोली हानाहानका घटना भएका छन् ।
